غزوہ بنوقریظہ | عہد شکنی اور حضرت جبرائیل کی آمد

بروز بدھ ، 22 یا 23 ذوالقعدہ، ¹سن 5 ہجری²کوغزوہ خندق سے واپس آنے كے بعدحضرت محمد مصطفیٰ نے اپنے صحابہ کرام کو بنو قریظہ کی طرف مخصوص مہم پرروانگی کا حکم دیا۔ ³اس مہم پر تشریف لے جانے کے لئے آپ کو حضرت جبرئیل نےحضرت دحیہ کلبی کی صورت میں حاضر ہوکر اللہ کے حکم سےآگاہ فرمایا۔ ⁴آپ نے دورانِ مہم حضرت عبداللہ بن مکتوم کو مدینہ منورہ کا والی مقرر کیا۔⁵اس مہم میں مسلمانوں نے تقریباً 15 روز تک یہودیوں کا محاصرہ کئے رکھا ⁶جس کے بعد یہودیوں نے ہتھیار ڈال دئے۔

نماز عصر کا معاملہ

غزوہ بنو قریظہ کے لئے روانہ ہوتے وقت آپ نے صحابہ کرام کو عصر کی نماز قبیلہ بنو قریظہ کے قریب پہنچ کر ادا کرنے کی ہدایت فرمائی۔مسلمانوں کی یہ فوج چھوٹے گروہوں کی صورت میں بنو قریظہ قبیلہ کی طرف روانہ ہوئی۔ ان میں سے ایک گروہ اپنی کوشش کے باوجود عصر کی نماز بنو قریظہ قبیلہ میں ادا کرنے سے قاصر رہا لہذا انہوں نے اپنی نماز عصر راستے ہی میں ادا فرما لی جس پر مسلمانوں کے اِن گروہوں کے درمیان تنازعہ کھڑا ہو گیا۔ وہ صحابہ کرام جنہوں نے راستے میں ہی عصر کی نماز ادا فرما لی تھی انہوں نے اس کی توجیہ یہ بیان کی کہ آپ کے حکم کا مطلب یہ تھا کہ جلد از جلد قبیلہ بنو قریظہ کے علاقے تک پہنچا جائے نہ کہ نماز عصر کی ادائیگی کے لیے کسی مخصوص مقام کا تعین آپ کا مقصود تھا۔ ⁷جبکہ صحابہ کرام کا دوسرا گروہ اس بات پر مُصر تھا کہ آپ کے دیے گئے حکم کی لفظ بہ لفظ اطاعت کی جائے یعنی نماز بنو قریظہ میں ہی ادا کرنی چاہئے تھی۔ ⁸چنانچہ یہ مسئلہ بعد میں جب آپ کی خدمت میں پیش کیا گیا تو آپ نے دونوں گروہوں میں سے کسی کو بھی اپنے موقف کے لحاظ سے غلط یا خطاکار قرار نہیں دیا۔⁹¹⁰

بنو قریظہ کا محاصرہ

حضرت محمد نے مسلمانوں کے لشکر کا عَلم حضرت علی بن ابی طالب کو عطا فرمایا اور انہیں حکم دیا کہ وہ فوج کے آگے چلیں۔¹¹اس حکم پر حضرت علی نے اسلامی لشکر پر سبقت فرمائی اورآپ سے پہلے ہی قبیلہ بنو قریظہ کے قلعوں تک پہنچ گئے۔آپ جب بنو قریظہ کی طرف روانہ ہوئے تو آپ کی ملاقات راستے میں چند صحابہ کرام سے ہوئی۔ آپ نے ان سے دریافت فرمایا کہ انہوں نے کسی کو اسلامی لشکرسےآگے جاتے ہوئے دیکھا ہے تو ان صحابہ کرام نے جواب دیا کہ حضرت دحیہ کلبی جو سفید خچر پر سوار تھےان سے آگے جاتے ہوئے دیکھے گئے ہیں۔آپ نے ان کا جواب سن کر مسلمانوں کو آگاہ فرمایا کہ وہ جس شخص کو دحیہ کلبی () سمجھ رہے ہیں وہ جبرائیل ہیں جو بنو قریظہ کی طرف اس لیے گئے ہیں تاکہ ان کے دلوں کو خوف اور ہیبت سے بھر دیں۔ ¹²جب آپ بنو قریظہ کے علاقے میں پہنچے تو آپ کے ساتھ 3000 صحابہ کرام کی جماعت تھی جنہوں نے ان یہود کے قلعوں کا محاصرہ کر لیا۔ ¹³

جب مسلمانوں نے بنو قریظہ کے تمام قلعوں کا ہر طرف سے محاصرہ کر لیا تو دو طرفہ تیر اندازی سے مقابلہ شروع ہوا۔اس کے ساتھ ساتھ برچھیوں اور پتھروں کا بھی دو طرفہ آزادانہ استعمال کیا گیالیکن کامیابی نا ملنے پر یہودی مایوس ہو گئے۔ ¹⁴مسلمانوں کا یہ محاصرہ 15 دن تک لگاتار جاری رہا۔¹⁵دیگر اقوال کے مطابق بنو قریظہ کے قلعوں کا محاصرہ 25 دن تک جاری رہا۔¹⁶ابن ہشام¹⁷ابن قیم الجوزی¹⁸اور باقی کئی علماء اسی رائے کے قائل ہیں ۔¹⁹²⁰²¹تاہم جب اس رائے کا تقابل مسلمان فوج کی بنو قریظہ کی طرف روانگی کی تاریخوں کے ساتھ کر کے دیکھا جائے اور پھر مسلمان فوج کے واپس مدینہ منورہ پہنچنے کی تاریخ کے ساتھ اس کا موازنہ کیا جائے تو یہ رائے درست معلوم نہیں ہوتی۔اس کی وجہ یہ ہے کہ دیگر مسلمان سیرت نگار اور مورخین کے مطابق آپ اور مسلمان فوج بنو قریظہ کے محاصرے کے لیے مدینہ منورہ سے 23 ذوالقعدہ 5 ہجری کوروانہ ہوئے²²اور مدینہ منورہ ان کی واپسی 7 ذوالحجہ کو ہوئی، ²³جس کے مطابق یہ عرصہ 14 سے 15 دن کا بنتا ہے۔ ابن عقبہ کے مطابق یہ محاصرہ 13 سے 19 دن پر مشتمل تھا ²⁴جبکہ بعض دوسرے اہل علم کے مطابق ²⁵جس میں ابن سعد²⁶بھی شامل ہیں انہوں نے اس بات کی صراحت اور حتمی وضاحت کی ہے کہ محاصرے کا مجموعی عرصہ 15 دن پر ہی مشتمل تھا۔

محاصرہ کے دوران حیی بن اخطب بھی اس وقت بنو قریظہ کے قلعوں کے اندر تھا کیونکہ اس نے بنو قریظہ سے وعدہ کیا تھا کہ اگر قریش ان کی مدد کو نہیں آئے یا مدد کیے بغیر واپس مکہ چلے گئےتو وہ آخر دم تک ان کے ساتھ رہے گا۔²⁷

نباش بن قیس کے مسلمانوں کے ساتھ مذاکرات

یہودی قبیلہ بنو قریظہ نے جب اس بات کو محسوس کیا کہ مسلمان کسی بھی صورت بغیر فتح اور مقصد کے حصول کے واپس نہیں جائیں گے تو انہوں نے نباش بن قیس کو آپ کے ساتھ مذاکرات کے لیے بھیجا۔ نباش نے خود آپ سے یہ درخواست کی کہ وہ بنو قریظہ کے لیے ویسا ہی فیصلہ جاری فرمائیں جس طرح کہ انہوں نے بنو نضیر کے لیے جاری فرمایا تھا۔ اس نے خود اس بات کی تجویز دی کہ بنو قریظہ مدینہ منورہ سے صرف وہی سامان اپنے ساتھ لے کر جائیں گے جس کی انہیں ضرورت ہوگی اور جو کچھ وہ صرف اپنے اونٹوں پر لاد کر لے جا سکتے ہوں گےجبکہ اپنا بقیہ سامان وہ مسلمانوں کے حوالے کر کے چلے جائیں گے۔ آپ نے نباش کی اس تجویز کو مسترد کر دیا۔ نباش نے دوسری تجویز یہ دی کہ پھر آپ انہیں اس بات کی اجازت دے دیں کہ وہ بغیر کسی سامان کے مدینہ منورہ چھوڑ جائیں۔ ²⁸آپنے اس کی پیش کردہ یہ تجویز بھی مسترد کر دی اور یہ اعلان فرمایا کہ بنو قریظہ کو اب آپ کا کیا ہوا فیصلہ ہی ماننا گا۔

نباش بن قیس واپس قلعہ کی طرف لوٹ کر گیا اور کعب بن اسد جو اس وقت قبیلہ بنو قریظہ کے سردار تھے انہیں آپ کے فیصلے سے آگاہ کیا۔ کعب بن اسد نے اپنے تمام لوگوں کو جمع کیا اور انہیں سخت لعنت و ملامت کی۔اس نے اپنے قبیلے کے لوگوں کے سامنے اللہ تعالی کی قسم اٹھا کر کہا کہ اہل یہود آپ پر محض حسد کی بنیاد پر ایمان اس لیے نہیں لائے کیونکہ آپ کی ولادت یہود کے ہاں نہیں ہوئی ورنہ یہود کو اس بات کو اچھی طرح جانتے تھے کہ وہ اللہ کے سچے رسول ہیں۔کعب نے مزید یہ کہا کہ اس نے کبھی نہیں چاہا کہ وہ آپ کی مخالفت یا دشمنی کرے اور ان سے کیا ہوا معاہدہ توڑ ے لیکن یہودی قبیلہ بنو نضیر کہ سردار حیی بن اخطب نے اسے آپ کی مخالفت پر مجبور کیا۔²⁹

کعب بن اسد کی بنو قریظہ کو تجویز

کعب بن اسد بذات خود آپ کی نبوت پر ایمان رکھتا تھا اس لیے اس نے اپنے لوگوں کو ابن الخراش کی بنو قریظہ میں آمد کے موقع پر آپ کی آمد سے متعلقہ پیش گوئی کی یاد دہانی بھی کروائی۔اس نے واضح طور پر بنو قریظہ کے لوگوں سے کہا تھا کہ انہیں چاہیے کہ وہ حضور کے معاون و مددگار بنیں اور کبھی ان کی مخالفت نہ کریں۔تاہم بنو قریظہ کی حسد اور جہالت نے انہیں یہ سب کچھ سننے کے باوجود بھی اپنے سردار کی بات ماننے اور آپ کی نبوت پر ایمان لانے سے روک دیا تھا۔³⁰کعب بن اسد نے صورتحال کی سنگینی کو سمجھتے ہوئے اپنے لوگوں کو آخری چارہ کے طور پر 3 باتوں میں سے ایک بات اختیار کرنے کا مشورہ دیا۔³¹اس نے کہا:

1. یا تو وہ لوگ آپ کو اللہ کے آخری نبی اور رسول ہونے کی حیثیت سے قبول کر لیں۔
2. یا وہ اپنے بچوں اور اہل خانہ کو اپنے ہاتھوں سے قتل کر کے مسلمانوں کے خلاف لڑنے کے لیے میدان جنگ میں آجائیں۔
3. یا پھر مسلمانوں پر یوم سبت کی شب کو حملہ آور ہوں تاکہ مسلمان اس بات کی توقع اور امید بھی نہ کر سکیں کہ یہودی خود اپنے مقدس دن کی حرمت کو پامال کر کے ان پر حملہ آور ہوں گے اور نتیجہ کے طور پر یہودی مسلمانوں کو مغلوب کر کے خود غالب اور فاتح ہو جائیں۔ ³²

بنو قریظہ نے اپنے لیے ان سارے انتخابات کو مسترد کر دیا کیونکہ ان میں سے کوئی بھی نکتہ انہیں اپنے لیے فائدہ مند نظر نہیں آرہا تھا۔

بنو قریظہ کا ابو لبابہ کے ساتھ ملاقات کا مطالبہ

جب بنی قریظہ نے کعب بن اسد کے پیش کردہ تمام نکات کو غیر نفع بخش سمجھا تو انہوں نے حضرت ابو لبابہ سے ملاقات کی درخواست کی جن کا تعلق اوس قبیلہ سے تھا۔ زمانہ جاہلیت میں یہود اور اوس قبیلہ کے آپس میں بڑے اچھے تعلقات رہے تھے۔ اسی تناظر میں یہود نے آپ سےیہ درخواست کی کہ آپ حضرت ابو لبابہ کو ان کے معاملہ میں مشاورت کے لیے بھیجنے کی اجازت مرحمت فرمائیں۔آپ نے ان کی یہ درخواست قبول فرمالی۔ جب حضرت ابو لبابہ ان کے قلعہ میں داخل ہوئے تو انہیں یہودی خواتین اور بچوں نے گھیر لیا اور ان سے مدد کی درخواست کی۔انہوں نے حضرت ابو لبابہ سے اس معاملے پر بھی پوچھا کہ اگر وہ مسلمانوں کے خلاف غداری اور بغاوت کے حوالے سےآپکا فیصلہ اپنے حق میں قبول کر لیتے ہیں تو انہیں کیا سزا دی جائے گی۔³³³⁴حضرت ابولبابہ نے انہیں اپنی انگلی کے اشارے سے آگاہ فرمایا کہ اگر وہ آپ کے فیصلے کو قبول کر لیتے ہیں تو انہیں مسلمانوں کے خلاف جنگ خندق میں بغاوت اور غداری کی وجہ سے سزائے موت کا سامنا کرنا پڑے گا۔³⁵یہود کو یہ بات بتانے کے بعد حضرت ابو لبابہ کو محسوس ہوا کہ انہوں نے آپ کے راز کو افشا کر دیا ہے اور وہ خود آپ سے بے وفائی کے مرتکب ہوگئے ہیں۔ حضرت ابو لبابہ کے اوپر اپنی اس خطا کا اتنا زیادہ اثر ہوا کہ وہ زار و قطار رونے لگے یہاں تک کہ ان کی داڑھی مبارک ان کے آنسوؤں سے تَر ہو گئی ۔³⁶

اس واقعہ کے بعد حضرت ابو لبابہ میں یہ قوت اور طاقت نہ رہی کہ وہ نبی کریم کا سامنا کر سکیں۔³⁷چنانچہ وہ آپ کی خدمت میں حاضر ہونے کے بجائے سیدھا مدینہ منورہ واپس ہو گئے جہاں جا کر انہوں نے اپنے آپ کو مسجد نبوی کے ستون کے ساتھ باندھ لیا ۔³⁸آپ کو جب حضرت ابو لبابہ کی خود ساختہ سزا کا علم ہوا تو آپ نے فرمایا بہتر ہوتا کہ ابو لبابہ () براہ راست آپ کے پاس ہی ا ٓجاتے۔ اب جب کہ ابو لبابہ ()نے خود اپنے لیے سزا کا فیصلہ کر لیا ہے تو وہ اس وقت ہی آزاد ہو سکیں گے جب اللہ تعالی براہ راست خود انہیں وحی کے ذریعے معافی کا پروانہ عطا فرما ئے گا۔ ³⁹حضرت ابو لبابہ نے یہ سزا اور مشقت کئی دنوں تک صحرا کی جھلسا دینے والی گرمی میں بغیر کھائے پیئے برداشت کرنے کی قسم اٹھائی اور اپنے آپ سے اس بات کا عہد کیا کہ وہ اسی حالت میں یا تو مر جائیں گے اور یا پھر اللہ تعالی انہیں معاف فرما دے گا۔⁴⁰اس دوران حضرت ابو لبابہ کی اہلیہ فرض نمازوں کے اوقات میں ا ٓکر ان کی رسی کھول دیا کرتیں اور نماز کی ادائیگی کے بعد دوبارہ انہیں ستون سے باندھ دیا کرتی تھیں۔ان کی اپنے لیے تجویز کردہ یہ سزا 6 دن رات تک جاری رہی یہاں تک کہ اللہ تعالی نے ان کے لیے معافی کا پروانہ جاری فرما دیا اور خود نبی کریم نے انہیں اپنے دست مبارک سے ستون کے ساتھ بندھی ہوئی رسی کی بندش سے آزاد فرما دیا ۔⁴¹

بنو قریظہ کی خود سُپردگی

حضرت ابو لبابہ کے چلے جانے کے بعد بنو قریظہ کے لوگوں کو اس بات کا اندازہ ہو چکا تھا کہ مسلمان جب تک کامیاب نہ ہو جائیں اس وقت تک محاصرہ جاری رہے گا جبکہ دوسری طرف یہود کے حالات دن بدن خراب سے خراب تر ہوتے چلے جا رہے تھے ۔چنانچہ بنو قریظہ نے آپ کے فیصلے کو غیر مشروط طور پر قبول کرنے کے لیے آمادگی ظاہر کر دی۔ انہوں نے اپنے قلعوں کے دروازے کھولے اور باہر آگئے۔ان کے مَردوں کو گرفتار کر لیا گیا جبکہ خواتین اور بچوں کو علیحدہ ایک جگہ بغیر کسی تکلیف دیے ہوئے جمع کر دیا گیا۔ ⁴²اس فتح کے بعد آپ کے چند انصاری صحابہ جن کا تعلق اوس قبیلہ سے تھا وہ آپ کی خدمت میں حاضر ہوئے اور آپ سے درخواست کی کہ بنو قریظہ کی جان بخشی کی جائے۔انصاری صحابہ کی مسلسل درخواستوں پر آپ نے اپنے دوسرےصحابہ کرام سے مشورہ کیا ⁴³اور فرمایا:

ألا ترضون أن يحكم فيهم رجل منكم؟⁴⁴

کیا تمہیں یہ بات پسند نہیں کہ تم ہی (قبیلہ اوس)میں سے ایک شخص ان کے بارے میں فیصلہ کر لے؟

آپ کی اس تجویز سے سب نے اتفاق کیا جس پر آپ نے حضرت سعد بن معاذ کا انتخاب فرمایا ⁴⁵اور ابن عقبہ کی روایت کے مطابق آپ نے صحابہ کرام کو یہ اختیار دیا کہ وہ جسے چاہیں یہود کے بارے میں فیصلہ کرنے کے لیے منتخب فرما لیں۔ اس طرح انصاری صحابہ کرام نے حضرت سعد بن معاذ کا انتخاب کیا جس پر آپ بھی خوش ہوئے۔ ⁴⁶بعض روایات کے مطابق سعد بن معاذ کا انتخاب خود قبیلہ بنو قریظہ نے کیا تھا۔ ⁴⁷اس وقت سعد بن معاذ مدینہ میں تھے اور اپنے زخمی ہو جانے کی وجہ سے اس محاصرے میں شریک نہیں ہوسکے تھے۔ جب ان کا انتخاب کیا گیا تو قبیلہ اوس کہ لوگ واپس مدینہ منورہ آئے تاکہ حضرت سعد بن معاذ کو قبیلہ بنو قریظہ کی قسمت کا فیصلہ کرنے کے لیے وہاں لے جایا جا سکے۔حضرت سعد بن معاذ کو بنو قریظہ کی طرف لے جاتے ہوئے انصاری صحابہ کرام نے مسلسل کوشش کی کہ وہ انہیں اسے بات پر قائل کرسکیں کہ وہ بنو قریظہ کے حق میں فیصلہ فرمادیں۔حضرت سعد جب وہاں پہنچے تو انہوں نے انصار صحابہ کرام سے پوچھا کہ کیا وہ ان کے فیصلے کو قبول کریں گے تو تمام صحابہ کرام نے اجتماعی طور پر ان کا فیصلہ قبول کرنے کے لیے رضامندی کا اظہار کیا اور کہا کہ وہ جو بھی فیصلہ فرمائیں گے وہ بغیر کسی سوال کے قبول کر لیا جائے گا۔⁴⁸حضرت سعد بن معاذ نے اپنا فیصلہ سناتے ہوئے فرمایا:

۔۔۔فإني أحكم فيهم أن تقتل المقاتلة، وأن تسبى الذرية والنساء، وتقسم أموالهم۔⁴⁹

میں تو ان کے بارے میں یہ فیصلہ کرتا ہوں کہ ان کے مسلمانوں کے خلاف لڑنے والے مردوں کو قتل کردیا جائے اور ان کے بچوں او ر عورتوں کو قید کیا جائے اور ان کے اموال کو مسلمانوں کے درمیان تقسیم کردیا جائے۔

آپ نے جب حضرت سعد بن معاذ کا فیصلہ سنا تو فرمایا:

لقد حكمت فيهم بحكم اللّٰه عز وجل۔⁵⁰

تم نے اللہ تعالی کی مرضی کے مطابق فیصلہ کیا ہے۔

جب یہود کے بارے میں حضرت سعد بن معاذ فیصلہ دے چکے تو مسلمان مدینہ واپس جنگی قیدیوں کے ساتھ لوٹ آئے۔مدینہ منورہ پہنچ کر تمام قیدی جن کی تعداد 600 سے 700 کے لگ بھگ تھی انہیں اُن کی عہد شکنی اور مسلمانوں کے ساتھ غداری کی سزا کے طور پر قتل کر دیا گیا۔ 00 15تلواریں، 2000 برچھے، بھالے اور300 زرہیں مال غنیمت کے طور پر مسلمانوں میں تقسیم کر دی گئیں۔ ⁵¹اس دوران مسلمانوں کی طرف سے حضرت خلاد بن سوید ایک یہودی عورت کی طرف سے پھینکے گئے نیزے کے لگنے سے شہید ہوئے۔⁵²اور اللہ تعالی نے بنو قریظہ کے یہودیوں کے بارے میں جو کچھ ارشاد فرمایا تھا⁵³ وہ لفظ بہ لفظ صحیح ثابت ہوا کیونکہ مسلمانوں نے اس بار آگے بڑھ کر بنو قریظہ کا محاصرہ کر کے انہیں ان کی عہد شکنی اور مسلمانوں کے ساتھ غداری کا سبق ہمیشہ کےلیے سکھا دیا تھا۔

• ¹  ابو عبد الله محمد بن عبد الباقي الزرقاني، شرح الزرقاني على المواهب اللدنية بالمنح المحمدية، ج-3، مطبوعۃ: دارالکتب العلمیۃ، البیروت، لبنان، 2012م، ص: 65
• ²  ابو محمد عبد الملک بن ھشام المعافري، السیرۃ النبویۃ لابن ھشام، مطبوعۃ: دارالکتب العلمیۃ، بیروت، لبنان، 2009م، ص: 633
• ³  محمد بن یوسف الصالحی الشامی، سبل الھدی والرشاد فی سیرۃ خیر العبادﷺ، ج-5، مطبوعة: دارالکتب العلمیۃ، بیروت، لبنان، 2013م، ص: 4
• ⁴  شیخ حسین بن محمد الدیار بکری، تاريخ الخميس في أحوال أنفس النفيسﷺ، ج-2، مطبوعة: دارالکتب العلمیۃ، بيروت، لبنان، 2009م، ص: 316
• ⁵  ابو عبداللہ محمد بن ابی بکر بن قیم الجوزی، سیرۃ خیر العباد (اعداد، صالح احمد الشامی)، مطبوعۃ: المکتب الاسلامی، بیروت، لبنان، 2000م، ص: 198
• ⁶  ابو عبد اللہ محمد بن سعد البصری،الطبقات الکبری، ج-2، مطبوعۃ: دار الکتب العلمیۃ، بیروت، لبنان، 1990م، ص: 57
• ⁷  شمس الدين محمد بن ابي بكر ابن القيم الجوزيۃ، زاد المعاد في هدي خير العباد، ج-3، مطبوعة: مؤسسة الرسالة، بيروت، لبنان،2005 مـ، ص: 119-118
• ⁸  شیخ حسین بن محمد الدیار بکری، تاريخ الخميس في أحوال أنفس النفيسﷺ، ج-2، مطبوعة: دارالکتب العلمیۃ، بيروت، لبنان، 2009م، ص: 317
• ⁹  محمد ابن اسمعیل البخاری، صحیح البخاری، حدیث: 4119، مطبوعۃ: دار السلام للنشر والتوزیع، الریاض، السعودیۃ، 1999م، ص: 698
• ¹⁰  ابوالفداء اسماعیل بن عمرابن کثیر الدمشقی، السیرۃ النبویۃ لابن کثیر، مطبوعۃ: دارالکتب العلمیۃ، بیروت، لبنان، 2011م، ص: 347
• ¹¹  شیخ حسین بن محمد الدیار بکری، تاريخ الخميس في أحوال أنفس النفيسﷺ، ج-2، مطبوعة: دارالکتب العلمیۃ، بيروت، لبنان، 2009م، ص: 316
• ¹²  ابو محمد عبد الملک بن ھشام المعافري، السیرۃ النبویۃ لابن ھشام، مطبوعۃ: دارالکتب العلمیۃ، بیروت، لبنان، 2009م، ص: 633
• ¹³  شیخ صفی الرحمن مبارکفوری،الرحیق المختوم، مطبوعۃ: دارابن حزم، بیروت، لبنان، 2010م، ص: 326
• ¹⁴  محمد بن یوسف الصالحی الشامی، سبل الھدی والرشاد فی سیرۃ خیر العبادﷺ، ج-5، مطبوعة: دارالکتب العلمیۃ، بیروت، لبنان، 2013م، ص: 6
• ¹⁵  ابو عبد اللہ محمد بن سعد البصری،الطبقات الکبری، ج-2، مطبوعۃ: دار الکتب العلمیۃ، بیروت، لبنان، 1990م، ص: 57
• ¹⁶  شیخ صفی الرحمن مبارکفوری،الرحیق المختوم، مطبوعۃ: دارابن حزم، بیروت، لبنان، 2010م، ص: 330
• ¹⁷  ابو محمد عبد الملک بن ھشام المعافري، السیرۃ النبویۃ لابن ھشام، مطبوعۃ: دارالکتب العلمیۃ، بیروت، لبنان، 2009م، ص: 634
• ¹⁸  شمس الدين محمد بن ابي بكر ابن القيم الجوزيۃ، زاد المعاد في هدي خير العباد، ج-3، مطبوعة: مؤسسة الرسالة، بيروت، لبنان،2005 مـ، ص: 120
• ¹⁹  ابوعبداللہ احمد بن محمد بن حنبل الشیبانی، مسندالامام احمد بن حنبل، حدیث: 25097، ج-42، مطبوعۃ: مؤسسۃ الرسالۃ، بیروت، لبنان، 2001م، ص: 28
• ²⁰  ابو یعقوب اسحاق بن ابراهیم المروزی المعروف بابن راهويه، مسند اسحاق بن راهویه، حدیث: 1126، ج-2، مطبوعۃ: مکتبۃ الایمان، المدینۃ، السعودية، 1991م، ص: 544
• ²¹  ابو حاتم محمد بن حبان البستی الدارمي، الإحسان فی تقریب صحیح ابن حبان، حدیث: 7028، ج-15، مطبوعۃ: مؤسسۃ الرسالۃ، بیروت، لبنان، 1988م، ص: 500
• ²²  ابو عبد الله محمد بن عبد الباقي الزرقاني، شرح الزرقاني على المواهب اللدنية بالمنح المحمدية، ج-3، مطبوعۃ: دارالکتب العلمیۃ، البیروت، لبنان، 2012م، ص: 65
• ²³  ابو عبد اللہ محمد بن سعد البصری،الطبقات الکبری، ج-2، مطبوعۃ: دار الکتب العلمیۃ، بیروت، لبنان، 1990م، ص: 57
• ²⁴  محمد بن یوسف الصالحی الشامی، سبل الھدی والرشاد فی سیرۃ خیر العبادﷺ، ج-5، مطبوعة: دارالکتب العلمیۃ، بیروت، لبنان، 2013م، ص: 20
• ²⁵  شیخ حسین بن محمد الدیار بکری، تاريخ الخميس في أحوال أنفس النفيسﷺ، ج-2، مطبوعة: دارالکتب العلمیۃ، بيروت، لبنان، 2009م، ص: 318
• ²⁶  ابو عبد اللہ محمد بن سعد البصری،الطبقات الکبری، ج-2، مطبوعۃ: دار الکتب العلمیۃ، بیروت، لبنان، 1990م، ص: 57
• ²⁷  ابوالفداء اسماعیل بن عمرابن کثیر الدمشقی، السیرۃ النبویۃ لابن کثیر، مطبوعۃ: دارالکتب العلمیۃ، بیروت، لبنان، 2011م، ص: 347
• ²⁸  محمد بن یوسف الصالحی الشامی، سبل الھدی والرشاد فی سیرۃ خیر العباد، ج-5، مطبوعة: دارالکتب العلمیۃ، بیروت، لبنان، 2013م، ص: 6
• ²⁹  ابوالفرج علي بن إبراهيم الحلبي، انسان العیون فی سیرۃ الامین المامون، ج-2، مطبوعۃ: دار الكتب العلمية، بيروت، لبنان، 2013م، ص: 444
• ³⁰  ابو عبداللہ محمد بن عمرالواقدی، المغازی، ج-2، مطبوعۃ: دار الکتب العلمیہ، بیروت، لبنان، 2004م، ص: 7
• ³¹  أبو جعفر محمد بن جریر الطبری، تاریخ الرسل والملوک، ج-2، مطبوعۃ: دار المعارف، القاهرة، مصر، 1967م، ص: 584
• ³²  ابوالفداء اسماعیل بن عمرابن کثیر الدمشقی، السیرۃ النبویۃ لابن کثیر، مطبوعۃ: دارالکتب العلمیۃ، بیروت، لبنان، 2011م، ص: 347
• ³³  محمد بن یوسف الصالحی الشامی، سبل الھدی والرشاد فی سیرۃ خیر العبادﷺ، ج-5، مطبوعة: دارالکتب العلمیۃ، بیروت، لبنان، 2013م، ص: 8
• ³⁴  ابو عبداللہ محمد بن ابی بکر بن قیم الجوزی، سیرۃ خیر العباد (اعداد صالح احمد الشامی)، مطبوعۃ: المکتب الاسلامی، بیروت، لبنان، 2000م، ص: 198
• ³⁵  أبو عبد الله محمد بن أحمد شمس الدين الذھبی، السیرۃ النبویۃ من کتاب تاریخ الاسلام، مطبوعۃ: دار ابن حزم، بیروت، لبنان، 2010م، ص: 448
• ³⁶  ابو عبد الله محمد بن عبد الباقي الزرقاني، شرح الزرقاني على المواهب اللدنية بالمنح المحمدية، ج-3، مطبوعۃ: دارالکتب العلمیۃ، البیروت، لبنان، 2012م، ص: 76
• ³⁷  ابو ابكر احمد بن حسين البيهقي، دلائل النبوة ومعرفۃ احوال صاحب الشریعۃﷺ، ج-4، مطبوعۃ: دار الکتب العلمیۃ، بیروت، لبنان، 2008م، ص: 16
• ³⁸  أبو زید عبد الرحمن بن محمد ابن خلدون الأشبیلی، ديوان المبتدأ والخبر في تاريخ العرب والبربر ومن عاصرهم من ذوي الشأن الأكبر المعروف بتاریخ ابن خلدون، ج-2، مطبوعۃ: دار الفکر، بیروت، لبنان، 1988م، ص: 443
• ³⁹  شیخ احمد بن محمد القسطلانی، المواھب اللدنیۃ بالمنح المحمدیۃ، ج-1، مطبوعۃ: دار الکتب العلمیۃ، بیروت، لبنان، 2009م، ص: 250
• ⁴⁰  ابو عبداللہ محمد بن عمرالواقدی، المغازی، ج-2، مطبوعۃ: دار الکتب العلمیہ، بیروت، لبنان، 2004م، ص: 11
• ⁴¹  ابو محمد عبد الملک بن ھشام المعافري، السیرۃ النبویۃ لابن ھشام، مطبوعۃ: دارالکتب العلمیۃ، بیروت، لبنان، 2009م، ص: 635
• ⁴²  شیخ صفی الرحمن مبارکفوری،الرحیق المختوم، مطبوعۃ: دارابن حزم، بیروت، لبنان، 2010م، ص: 327
• ⁴³  الحافظ يوسف بن البر النمری، الدرر في اختصار المغازي والسير، مطبوعۃ: دار المعارف، القاهرة، مصر، 1403ھ، ص: 180
• ⁴⁴  أبو زید عبد الرحمن بن محمد ابن خلدون الأشبیلی، ديوان المبتدأ والخبر في تاريخ العرب والبربر ومن عاصرهم من ذوي الشأن الأكبر المعروف بتاریخ ابن خلدون، ج-2، مطبوعۃ: دار الفکر، بیروت، لبنان، 1981م، ص: 443
• ⁴⁵  ایضا
• ⁴⁶  محمد بن یوسف الصالحی الشامی، سبل الھدی والرشاد فی سیرۃ خیر العبادﷺ، ج-5، مطبوعة: دارالکتب العلمیۃ، بیروت، لبنان، 2013م، ص: 10
• ⁴⁷  ابو القاسم سلیمان بن احمد الطبرانی،المعجم الکبیر للطبرانی، حدیث: 5327، ج-6، مطبوعۃ: مکتبۃ ابن تیمیۃ، القاہرۃ، مصر، 1994م، ص: 7
• ⁴⁸  ابو عبداللہ محمد بن عمرالواقدی، المغازی، ج-2، مطبوعۃ: دار الکتب العلمیہ، بیروت، لبنان، 2004م، ص: 14-15
• ⁴⁹  مسلم بن الحجاج النیسابوری، صحیح المسلم، حدیث: 4598، مطبوعۃ: دارالسلام للنشر والتوزیع، الریاض، السعودیۃ، 2000م، ص: 785
• ⁵⁰  ایضاً، حدیث: 4599
• ⁵¹  شیخ صفی الرحمن مبارکفوری،الرحیق المختوم، مطبوعۃ: دارابن حزم، بیروت، لبنان، 2010م، ص: 328
• ⁵²  ایضاً، ص: 330
• ⁵³  القرآن، سورۃ الاحزاب 33: 25-27