شعب ابی طالب

مکّۃ المکرّمہ کے نزدیک ایک پہاڑ کی گھاٹی کا نام ہے۔ جہاں 7 نبوی بمطابق ستمبر 615ء میں حضور نبی کریم ﷺ اور خاندان بنو ہاشم کو پناہ لینی پڑی۔ اس تکلیف دہ واقعہ کا سبب قریشِ مکہ کا وہ سفاک اور ظالمانہ منصوبہ تھاجو قریش مکّہ نے اسلام کی دعوت اور اس کی آواز کو دبانے کے لیے بنایا تھا۔ یعنی بنو ہاشم سے ہر طرح کے تعلقات توڑ لیے جائیں۔ یہ معاشرتی مقاطعہ (Social Boycott) محرم 10نبوی تک تقریباً تین سال جاری رہا۔ اس دوران میں حضور ﷺ اور ان کے خاندان کو نہایت مشکلات کا سامنا رہا۔ ان حالات کا اندازہ اس بات سے لگایا جا سکتا ہے کہ اس دوران میں بھوک کو مٹانے کے لیے بعض اوقات درختوں کی جڑیں چبانا پڑتی تھیں اور پیٹ پر کھجور کے تنے یا چمڑا باندھنا پڑتا تھا۔